Бројот на загинати во катастрофалните поплави во Шпанија денеска се искачи на најмалку 155 лица, од кои повеќето, повеќе од 100, се во областа Валенсија, објавија владини извори.
Претходно беше објавено дека во поплавите загинале најмалку 95 лица.
Жртви има и во Кастилја-Ла Манча и Андалузија, објави Паис.
Во регионот на Валенсија, шпанскиот премиер Педро Санчез рече дека „приоритет во моментов е да се пронајдат оние што исчезнале за да се олесни страдањето што го трпат семејствата“.
„Ќе ја поддржуваме потрагата по копно, море и воздух онолку долго колку што е потребно за да се најдат сите исчезнати луѓе. Ве молам, невремето продолжува, останете дома. Ве молиме, обрнете внимание на сите итни повици, нивните потреби, нивните препораки. Најважно е да се спасат што повеќе животи. AEMET издава предупредувања, ве молиме следете ги овие препораки“ вели Санчез.
Се стравува дека бројот на жртви ќе продолжи да расте, имајќи предвид дека многу се водат како исчезнати.
Фудбалскиот натпревар од 12. коло во Ла Лига помеѓу Валенсија и Реал Мадрид, кој требаше да се одигра во сабота, денеска беше одложен поради големите поплави на југот на Шпанија.
Дождовите предизвикаа поплави во широка област на јужна и источна Шпанија, од Малага до Валенсија. Полицијата и спасувачките возила користеа хеликоптери за да ги извлечат луѓето од нивните домови и користеа гумени чамци за да стигнат до возачите заробени на покривите на автомобилите.
Текстот Бројот на жртвите од поплавите во Шпанија се искачи на 155 лица е превземен од А1он.
