Велика Британија денеска објави нов пакет санкции против Русија, вклучувајќи замрзнување на имотот на повеќе директори на нафтената трговска компанија „Coral Energy Group“, која сега е позната како „2Rivers Group“.
Санкциите се дел од поширок пакет кој опфаќа и околу 100 танкери од руската таканаречена „флота во сенка“, а беа воведени паралелно со состанокот на лидерите на безбедносниот сојуз Заеднички експедициски сили (JEF) во Норвешка.
На списокот на санкционирани се Ахмед Керимов, Тахир Гарајев, Анар Мадатли, Талат Сафаров и Етибар Ејуб, за кои се наведува дека „имале корист од или ја поддржувале руската влада“, како директори на компанијата „Coral Energy Group“. Компанијата „Coral Energy“ ја основал Гарајев во 2010 година и имала канцеларии во Дубаи и Сингапур. Во текот на 2024 година, Сафаров, Керимов и Мадатли го презедоа управувањето и ја ребрендираа фирмата во „2Rivers Group“.
Британските власти наведоа дека „Coral Energy“ работела во енергетскиот сектор кој е од стратешко значење за Русија. Во декември 2024 година, „2Rivers“ беше ставена на британската листа на санкции, а компанијата тогаш изрази „длабоко разочарување“ поради таа одлука.
netpress.com.mk
