Двајца пензионирани полицајци и уште едно лице во периодот од декември во 2019 година до март 2021 година оддавале службени тајни на криминалната група Дуќанџиќ/Грчец, соопшти Обвинителството за гонење на организиран криминал и корупција.
„Осомничените, од користољубие, се поврзале со групата и како припадници со посебна улога, поттикнати од лидерот на групата Шеваљ Муареми пренесувале службени информации на третото лице, а за тоа добивале награда. Полицајците кои биле главни инспектори за имотни деликти предизвикале штета во работењето и ефикасноста на истражните органи и органите на прогонот и го отежнувале или оневозможувале обезбедувањето на доказите“, се наведува во соопштението на обвинителството.
Осомничените, заедно или поединечно, со информациите што ги споделувале, го отежнале докажувањето во пет кривично постапки, информираат од обвинителството.
Првично обезбедените материјални докази за првоосомничениот, како што се истакнува, упатуваат дека тој и членовите на неговото семејство поседуваат недвижен и движен имот и штедни влогови, што во големи размери ги надминуваат неговите законски приходи како полициски службеник.
„Се заканувале на жртва на обид за убиство по нарачка да ја смени изјавата дадена пред полицајци. Споделиле информации за убиство кое се случило во август во 2020 година. Потоа дале информации и за прислушувањето на лица кои беа опфатени со акцијата „Планина“. Оддавеле информации за обезбедени докази и сведоци за грабнување во септември во 2020 година. А за двојно убиство од март во 2021 година во Скопје биле пренесени информации кој е задржан во полициска станица, кои активности се преземаат и кои службени лица се вклучени во криминалистичкото истражување“, соопшти обвинителството.
