Еден маж беше прободен, а седум други полесно повредени денеска за време на вториот ден од фестивалот Санфермин во Памплона, на кој илјадници луѓе се собираат по тесните улици на средновековниот град за вековната традиција на трки со бикови.
Човекот кој беше прободен, опишан само како над 25 години, беше прободен под десната пазува од биковски рог, изјави портпаролката на градските служби за итни случаи.
-Тој моментално е под надзор, но е во стабилна состојба, им рече таа на новинарите.
Седум други лица претрпеа полесни повреди на рамената или главата.
На фестивалот, биковите се пуштаат на улиците, а потоа се тркаат до арената, каде што се одржуваат борбите.
Стотици навивачи, многумина облечени во традиционални бели кошули со црвени шалови, трчаат со нив.
Еден од биковите застана на средина од трката утрово и ги бркаше тркачите неколку минути.
Фестивалот, кој стана меѓународно познат по романот на Ернест Хемингвеј од 1926 година „И сонцето изгрева“, трае една недела на почетокот на јули.
Учесниците повремено се прободени во стотиците вакви трки што се одржуваат во Шпанија секоја година. Други повреди се почести. Најмалку 16 тркачи ги загубиле животите на фестивалот во Памплона во текот на годините, последната во 2009 година.
Покрај утринските трки и попладневните борби со бикови, Санфермин, исто така, вклучува непрекината песна и танц. Се одржуваат и религиозни настани во чест на Свети Фермин.
