Украинскиот претседател Володимир Зеленски соопшти дека на вчерашниот состанок во Истанбул Киев повторно побарал итен и целосен прекин на огнот, но Москва одговорила со нова рунда напади врз Одеса, Черкаси, Харков и уште неколку региони. Според него, руските сили испратиле 103 борбени дронови и четири ракети што погодиле станбени згради, пазарот „Привоз“ во Одеса и енергетски објекти во Харковската област. Во Харков загинале три лица, а во Черкаси е рането деветгодишно дете; вкупниот биланс надминува десет повредени.
„Русија со терор ја попречува дипломатијата. Војната мора да ја заврши агресорот“, напиша Зеленски на мрежата X, додавајќи дека Киев ќе продолжи да бара дипломатско решение, но и одговорност за руските напади. Тој повика на нов пакет санкции против Москва и интензивирање на украинските удари по логистичките и воените објекти на руската страна.
