Промените на Apple во правилата и надоместоците на App Store веројатно ќе добијат зелено светло од европските антимонополски регулатори, објави Ројтерс, повикувајќи се на извори запознаени со ова прашање. Овој потег ќе му овозможи на производителот на iPhone да избегне големи казни.
Компанијата минатиот месец објави дека програмерите ќе плаќаат надомест од 20 проценти за обработка на трансакции во рамките на App Store, додека оние запишани во програмата за мали бизниси на Apple би можеле да видат намалување на надоместокот на 13 проценти.
Програмерите кои ги пренасочуваат корисниците надвор од App Store кон алтернативни методи на плаќање ќе плаќаат надомест од пет до 15 проценти. Тие исто така ќе можат да објавуваат неограничен број линкови што ги водат корисниците до надворешни системи за плаќање.
Apple беше принуден да ги направи промените откако Европската комисија ја казни со 500 милиони евра во април за технички и комерцијални ограничувања што ги спречија програмерите на апликации да ги насочуваат корисниците кон подобри зделки надвор од App Store. Регулаторот рече дека тоа го крши Законот за дигитални пазари (DMA), кој има за цел да ја ограничи моќта на големите технолошки компании и да ја отвори конкуренцијата.
Потоа на Apple ѝ беа дадени 60 дена да ги отстрани спорните ограничувања со цел да се усогласи со правилата на DMA и да избегне казни. Доколку не реагираше, можеше да се соочи со дневни казни од пет проценти од просечниот дневен глобален приход, што би изнесувало околу 50 милиони евра дневно.
Европската комисија, според извори, очекува да ги одобри промените на Apple во наредните недели, иако конечната одлука може сè уште да варира.
„Сите опции остануваат отворени. Сè уште ги оценуваме предлозите на Apple“, соопшти Комисијата.
Apple сè уште не ги коментираше обвинувањата. Компанијата претходно овој месец објави дека ги имплементирала промените за да избегне казни, додека ја критикуваше Европската комисија за мешање во начинот на кој управува со App Store.
The post Избегнати драконски казни: Промените на правилата на Apple за App Store ги поминаа регулаторите на ЕУ appeared first on Локално.
