На 21 јули 1987 година, американската хард-рок сензација Guns N’ Roses го објавуваат својот легендарен деби албум – Appetite for Destruction, под етикетата на Geffen Records. Со ова издание, бендот од Лос Анџелес ја започнува една од најексплозивните и најуникатни кариери во рок музиката.
Во првите неколку месеци по објавувањето, Appetite for Destruction тешко се пробиваше, но со силната поддршка од MTV и радиостанците кои почнаа да ја вртат песната „Welcome to the Jungle“, Guns N’ Roses почнаа да го освојуваат светот. Следеа два уште поголеми хита: „Sweet Child O’ Mine“ – нивниот прв и единствен број 1 хит на Billboard Hot 100, и „Paradise City“ – химна што стана неизоставен дел од нивните концертни настапи.
Албумот не само што стигнува на врвот на Billboard 200, туку и ги руши сите очекувања. Со над 18 милиони продадени примероци во САД (и преку 30 милиони глобално), Appetite for Destruction станува најпродаван деби албум на сите времиња во Америка.
Албумот е олицетворение на уличниот звук на ЛА сцената од доцните 80-ти – мешавина од панк, блуз и метал. Вокалите на Axl Rose, гитарските рифови на Slash и суровата енергија на целиот бенд создадоа звук што се чувствува како експлозија.
38 години подоцна, Appetite for Destruction не само што е симбол на една ера, туку и темел на модерниот хард рок. Тоа е албум што сè уште инспирира музичари, фанови и критичари, оставајќи неизбришив белег во историјата на рокот.
The post На денешен ден во 1987 година Guns N’ Roses го објавуваат својот деби албум – Appetite for Destruction appeared first on ekran.
