Израелскиот премиер Бенјамин Нетанјаху денеска изјави дека Израел „силно ги погоди иранските фабрики на смртта“ за време на воздушните напади врз Иран во саботата.
– Силно ги оштетивме одбранбените системи на Иран и нивната способност за извоз на ракети. Не нападнавме обични машини или фабрики. Тоа се индустриски фабрики на смртта и ние силно ги погодивме – изјави Нетанјаху пред израелскиот парламент, објави „Тајмс оф Израел“.
Нетанјаху ги отфрли тврдењата дека Белата куќа го убедила да го намали одговорот на Израел на иранскиот балистички ракетен напад на 1 октомври, нагласувајќи дека Израелците „сами носат одлуки според нивните интереси и размислувања“.
Тој рече дека стратегијата на Израел против Иран и неговите сојузници е јасна.
– Нашата долгорочна стратегија е да ја разбиеме оската на злото, да им ги отсечеме пипците на југ и на север, да бараме висока цена за Иран и неговите сојузници и да го спречиме Иран да поседува нуклеарно оружје – посочи Нетанјаху.
Израел, додава тој, е „единствената пречка што го спречува Иран да го контролира Блискиот Исток и да му се заканува на остатокот од светот“.
– Фанатичната оска на злото предводена од Иран се заканува да ја уништи нашата земја и да зароби други земји во својата мрежа, заканувајќи му се пред се на Западот. Иран работи на залихи нуклеарни бомби и ќе може да му се заканува на целиот свет кога ќе посака – истакна тој.
Нетанјаху смета и дека Техеран размислува дека „ако падне Израел, целиот Блиски Исток ќе падне во негови раце“.
– Но, нема да паднеме. Ќе победиме и целиот свет ќе биде подобро место – заклучи Нетанјаху.
Текстот Нетанјаху: Силно удривме по фабриките на смртта во Иран е превземен од А1он.
