Израелските сили најавија проширување на своите воени операции кон „области каде што претходно не интервенирале“ во рамки на досега 21-месечната офанзива против Хамас. Војската ги повика жителите на Деир ал-Балах да се евакуираат, додека Обединетите нации проценуваат дека таму има меѓу 50.000 и 80.000 цивили.
Жителите започнаа масовно да се повлекуваат на југ, носејќи ги своите работи во раце или со колички влечени од магариња. Очевидци велат дека тенкови биле забележани како се приближуваат од Кан Јунис кон југоистокот на Деир ал-Балах.
„Слушнавме силни експлозии во текот на ноќта. Се плашиме дека се подготвува копнена офанзива“, изјави еден од жителите, Абу Слим. Друг, Хамди Абу Мугсиб, вели дека по ноќно интензивно гранатирање бил принуден со семејството да го напушти шаторот и да избега на север.
Портпаролот на Цивилната одбрана на Газа, Махмуд Басал, соопшти дека добиле повици за помош од семејства опколени во областа Барака, каде што има повредени, но никој не може да стигне до нив поради опасноста.
Маи Елававда, претставничка на британската хуманитарна организација „Медицинска помош за Палестина“, ја опиша ситуацијата како „исклучително критична“, нагласувајќи дека воените возила се на само 400 метри од нивната канцеларија.
Израелската армија сè уште не одговорила на барањата за коментар во врска со најновите напади.
