Денеска државниот секретар во МВР Сашо Петрушевски учествува во работата на 17-тата сесија на Работната група 4, Правда, слобода и безбедност (Поглавје 24) на тема „Ефикасност на институционалниот одговор во Република Македонија на препораките на ЕУ за конфискација и управување со имот стекнат од криминал“ во организација на Националната конвенција на Европската унија во Република Македонија (НКЕУ-МК).
Државниот секретар Петрушевски, кој е ко-претседавач на работната група се осврна на податоците на Европол за криминалните приходи од главните криминални пазари во Европската унија кои достигнуваат 139 милијарди евра, што соодветствува на 1% од бруто дoмашниот приход на ЕУ. Петрушевски истакна дека процентот на криминалните приходи кои институциите за спроведување на законот во ЕУ успеале да го одземат од рацете на криминалците останува под 2% од годишно проценетиот приход од организираниот криминал. Во продолжение на настанот, Петрушевски ја промовираше новата Стратегија за финансиска истраги и конфискација на имот за периодот 2024-2028 со акционен план, која минатиот месец беше усвоена од Владата на Македонија. Новата стратегија се базира на длабока анализа и усогласување на националното законодавство со релевантните меѓународни стандарди и реални потреби на институциите вклучени во финансиска истрага и конфискација на имот. Во подготовката на оваа Стратегија се ангажирани повеќе од 10 национални институции што гарантира дека сите активности се правилно испланирани и осмислени. Државниот секретар Петрушевски обраќањето го заврши со констатацијата дека „со успешно спроведената конфискација на нелегално стекнатиот имот ќе покажеме колку една држава вистински е посветена во борбата против организираниот криминал и корупција.
– Не постои успех во сузбивањето на организираниот криминал ако од криминалците не се одземе неосновано стекнатиот имот и доколку државата со еден мултиинституционален пристап не им докаже на криминалците дека криминалот не е исплатлив, без оглед на богатството кој го создава, дециден беше Петрушевски.
Настанот заврши со експертска анализа, дискусија и презентација на нацрт препораките на стручната јавност кои треба да послужат не само за исполнување на одредени надворешни критериуми, туку и за изградба на посилно, инклузивно и демократско општество.
