Светот на телевизијата тагува по загубата на американскиот актер Малком-Џамал Ворнер, најпознат по улогата на Тео Козби во култната серија „The Cosby Show“. Актерот почина на 54-годишна возраст за време на семејно летување во Коста Рика.
Несреќата се случила додека Ворнер пливал во океанот, кога го зафатила силна струја. Иако брзо бил изваден на брегот од други капачи, обидите на медицинските лица да го реанимираат биле неуспешни – смртта била констатирана на самото место.
Со него во водата бил и друг маж, чиј идентитет не е откриен, кој се наоѓа во критична состојба во болница. Според „People“, двете жртви биле извлечени пред доаѓањето на службите на Црвениот крст.
Малком-Џамал Ворнер стана телевизиска икона во 1980-тите, откако ја доби улогата на Тео Козби – синот на ликот на Бил Козби – и за многумина остана симбол на едно време. Подоцна оствари бројни телевизиски улоги, вклучувајќи ги сериите „The Resident“, „Suits“, „9-1-1“ и „Alert: Missing Persons Unit“.
И покрај славата, Ворнер го држеше својот приватен живот подалеку од очите на јавноста. Познато е дека беше оженет и дека има ќерка, но никогаш не ги откри нивните имиња.
Фановите, колегите и јавноста ширум светот се простуваат од актерот чие присуство на екраните ќе остане засекогаш запаметено.
