Во Метаноја Галерија, вечерва со почеток во 19:00 часот по седми пат ќе се реализира изложбата ,,Несовршен простор” – Созерцанија.
Трагите кои ги остава 2000 годишната Христијанска естетика во ликовната уметност, во мигови проблеснува низ делата на уметници чии творештва се делумно или понекогаш целосно посветени на трансцедентните теми, метафизички и мистични искуства поврзани со ликот на Исус Христос и неговите ученици и следбеници. Уметноста на верата им пркоси на времињата во кои владее материјалистичкиот свет.
Преку ранохристијанските базилики, мермерните иконостаси, симболизмот во мозаиците и релјефите, глинените икони од Виница, средновековното црковно сликарство кое блеска низ вековите со својата неповторлива убавина, иконите од Охридската и Пелагониска школа, дрворезите од барокниот преродбенски период, низ постимпресионистичките дела на основоположниците на предвоеното модерно македонско сликарство, преку опусот на Кондовски и Владимир Георгиевски, иако поретко, христијанските одблесоци се сè уште присутни во делата на современите македонски ликовни творци. Со оваа изложба сакаме да ги потенцираме токму тие ретки одблесоци.
На изложбата ќе биде опфатен дел од творештвата на современи уметници кои воспоставиле личносен однос и контакт со философијата и светлината на христијанството.
Во чест на творештвото на професорот Владимир Георгиевски и во соработка со неговото семејство и Галеријата Метаноја и оваа година на изложбата ,,Несовршен простор” ќе се додели наградата „Владимир Георгиевски – Златен лист“.
На изложбата учествуваат уметниците: Томе Мишев, Трајче Чатмов, Новица Трајковски, Синиша Новески, Тони Попов, Андреј Митевски, Милош Милосавлевиќ, Никола Пијанманов, Владимир Илиевски и Стефан Младеновски.
Изложбата е поддржана од Годишната програма на Министерството за култура, Галерија Метаноја и фамилијата на Владимир Георгиевски. Жирито за доделувањето на овогодинешната награда „Владимир Георгиевски“ се ликовниот уметник Сергеј Андреевски, д-р Коста Милков и Фросина Георгиевска.
Изложбата е финансирана преку годишната програма на Министерството за Култура.
The post По седми пат ќе се реализира изложбата ,,Несовршен простор” – Созерцанија, Христијанските симболи во современата македонска ликовна уметност appeared first on ekran.
