Операција на отворено срце изведена со помош на 3D-печатен модел, минатата недела е извршена на Универзитетската клиника „Државна кардиохирургија“ во Скопје. Ова претставува значаен чекор напред во хируршката иновација во Македонија. Под водство на д-р Васил Папестиев, медицинскиот тим ја извршил процедурата користејќи детален 3D-печатен модел на срцето на пациентот, кој одиграл клучна улога во успешноста на операцијата.
– Оваа технологија беше важна за нас. Деталниот модел ни овозможи да ги визуелизираме комплексностите на срцевиот дефект на пациентот однапред, што го олесни целиот процес и ја зголеми прецизноста на операцијата. Ова директно придонесе за полесна и побезбедна операција за нашиот пациент – вели д-р Папестиев.
Моделот е изработен од компанијата 3DLoom и обезбедил прецизна и анатомски точна реплика на срцето на пациентот, овозможувајќи му на хируршкиот тим точно да ја идентификува локацијата на септалниот дефект пред операцијата. Направено е детаљно предоперативно планирање чиј резултат било намалување на времетраењето на операцијата и намалување на ризикот од можни интероперативни компликации.
– Возбудени сме што учествувавме во оваа операција. Нашата мисија е да им обезбедиме на хирурзите напредни алатки за подобрување на хируршките резултати, а ова постигнување го нагласува потенцијалот на 3D-печатените модели на органи во унапредувањето на предоперативната подготовка – вели д-р Стефан Арсенков, ко-основач на 3DLoom.
Со користење на 3D моделот во планирањето на операцијата, медицинскиот тим во клиниката успеал да го оптимизира пристапот и да го скрати времетраењето на процедурата, што е од клучно значење кај ризичните кардиохируршки операции. Успешноста на оваа операција го истакнува значењето на интеграцијата на напредната медицинска технологија во клиничката пракса за подобрување на исходот за пациентите.
The post Операција на отворено срце со помош на 3D-печатен модел во Скопје first appeared on УМНО.МК.
