Почеток (Видео) На митингот на Трамп се нижеа вулгарни и расистички изјави, Маск доби овации

(Видео) На митингот на Трамп се нижеа вулгарни и расистички изјави, Маск доби овации

Макфакс
0 коментари
A+A-
Ресетирај

Републиканскиот претседателски кандидат Доналд Трамп вчера го предводеше предизборниот митинг во Медисон Сквер Гарден во Њујорк, кој започна со серија вулгарни и расистички изјави на сојузниците на поранешниот американски претседател.

Трамп сакаше да го искористи митингот, кој се одржува на место познато по кошаркарските игри на Никс и концертите на Били Џоел, за да го изнесе својот завршен аргумент против демократската претседателска кандидатка Камала Харис, иако државата Њујорк последен пат поддржа републикански претседателски кандидат во 1984 година.

„Би сакал да започнам со поставување на многу едноставно прашање. Дали ви е подобро сега отколку пред четири години“, рече Трамп на почетокот на говорот. Толпата извика: „Не“. Тој потоа вети дека ќе ја спречи „инвазијата на криминалците кои доаѓаат во нашата земја“ доколку победи на изборите на 5 ноември, нарекувајќи ја Харис „личност со многу низок коефициент на интелигенција“.

Списокот од најмалку 20 клучни говорници се движеше од поранешниот професионален борач Хулк Хоган, поранешниот градоначалник на Њујорк, Руди Џулијани до синовите на Трамп, Ерик и Дон Џуниор. Некои од говорниците на почетокот на Трамп користеа расистички изјави и јазик на омраза за да ја загреат публиката.

Руди Џулијани, поранешен градоначалник на Њујорк и поранешен личен адвокат на Трамп, лажно тврдеше дека Харис била „на страната на терористите“ во израелско-палестинскиот конфликт и дека сакала да ги доведе Палестинците во САД.

Американскиот милијардер Илон Маск, кој ја поддржува кандидатурата за реизбор на Трамп на неговата платформа Х, со огромно богатство и парични подароци кои веќе покренаа некои правни прашања, беше пречекан на сцената со скандирања „Илон“. „Ова е вид на позитивна енергија каква што е Америка“, рече Маск.

Маск, за кого Трамп рече дека би го избрал да ја предводи новата владина комисија за ефикасност, рече дека федералниот буџет може да биде намален за „најмалку“ 2 трилиони долари. Расходите на американскиот буџет надминаа 6,75 трилиони долари во фискалната 2024 година, која заврши на 30 септември.

Трамп доби овации во арената поради неговата остра реторика против мигрантите. Тој вети дека ќе се повика на Законот за странски непријатели од 1798 година за да ги депортира имигрантите со криминални досиеја. На собирот тој најави и нова политика на даночен кредит за семејните негуватели „кои се грижат за родител или близок“.

Кампањата на Трамп соопшти дека митингот во неделата во арената со 19.500 седишта, кој може да чини повеќе од 1 милион долари за изнајмување, е распродаден. Билетите се бесплатни и се достапни по принципот прв дојден, прв услужен.

Текстот (Видео) На митингот на Трамп се нижеа вулгарни и расистички изјави, Маск доби овации е превземен од МАКФАКС.

2024 – All Right Reserved. Designed and Developed by infobiro

@2024 - All Right Reserved. Designed and Developed by infobiro