На осум дена пред претседателските избори во Америка, кандидатот на Демократската партија Камала Харис и кандидатот на Републиканската партија Доналд Трамп се речиси изедначени во анкетите, но обложувалниците на поранешниот претседател му даваат значително поголеми шанси за победа.
Трамп го презеде водството во обложувалниците на почетокот на октомври и оттогаш неговата предност речиси континуирано расте.
Така, во BetOnline соодносот меѓу Трамп и Харис сега е 63 – 36 проценти, во Betfair 58 – 37, во Betsson 61-40, во Bovada 64 – 36, во Bwin 61 – 41, во Points Bet 61 – 40, во Polymarket 63 – 32 и во Смаркетс 58 – 38 проценти, пренесува Индекс.
Пазарите за обложување и податоците од анкетите се два од најпопуларните методи за предвидување на исходот од изборите. И двете имаат предности и недостатоци, а нивното разбирање може да даде појасна слика за нивната доверливост, објаснува американската електронска берза Nasdaq.
Пазарите за обложување имаат способност брзо да се прилагодат. Тие можат брзо да реагираат на нови информации или настани, како што беше случајот во 2016 година, кога протечените мејлови сериозно ја компромитираа Хилари Клинтон.
Способноста за брзо прилагодување е значајна предност, бидејќи им овозможува на пазарите за обложување да ги одразуваат моменталните перцепции на обложувачите.
Од друга страна, податоците од анкетите нудат различни предности. Анкетите можат да обезбедат поголем и поразновиден примерок, проверувајќи го мислењето од различни општествени групи, а не само од коцкарите. Нивната значајна предност е способноста да се фокусираат на одредени региони или демографија.
Податоците од истражувањето, сепак, имаат свои недостатоци, од кои еден од најзначајните е времето потребно за собирање и анализа на податоците. Тоа доцнење може да резултира со тоа што податоците од анкетата не се синхронизирани со моменталното расположение кое брзо се менува.
Друг недостаток на податоците од анкетите е можноста за промена на јавното мислење. Луѓето можат да се предомислат поради различни причини, така што нивната перцепција забележана во анкета не мора да се одразува на нивниот глас на денот на изборите.
