Руското издание на списанието „Форбс“ ја вклучи македонската балерина Стефанија Гаштарска на листата на осумте идни ѕвезди во Русија. Дваесетгодишната Стефанија се занимава со балет од девет години како ученичка во ДМБУЦ „Илија Николовски-Луј“, во класата на Дафина Данилоска-Кочевска. На 15 години замина да учи во Државното училиште во Перм (Русија), една од најстарите балетски школи кои работат по Ваганова методот, а образованието го продолжи во Академијата за балет на „Бољшој“. На 16 години настапи во Бољшој, играјќи ја принцезата Аурора од балетот „Заспаната убавица“ на балетската гала вечер посветена на кореографот Мариус Петипа, на која настапија 240 претставници од најдобрите балетски школи во Русија.
Гаштарска имаше премиера на балетот „Ромео и Јулија“, каде што ја игра главната женска улога. Ова не е прв пат ова престижно списание да ја вклучи Гаштарска на оваа листа.
За една сезона изигра седум главни улоги во најголемите класични дела. На гостување во театарот „Михајловски“ во Санкт Петербург играше во „Лебедово езеро“, а критичарите ја споредија со Ана Павлова.
„Мекоста и тежината на нејзиниот танц точно го одразуваат нејзиниот кореографски стил“, вели „Форбс“.
The post Македонската балерина Стефанија Гаштарска на листата на „Форбс“ на осум идни ѕвезди во Русија first appeared on УМНО.МК.
