Градските советници од партијата Левица, како и Зелениот сектор, поднесоа барања до Град Скопје, Државниот инспекторат за животна средина, како и до Општина Шуто Оризари, да испратат надлежни лица и инспектори за да ја отстранат, како што велат, најголемата дива депонија во Македонија, која се наоѓа во Шуто Оризари, на само неколку километри од центарот на Скопје. Од Левица – Зелен сектор реагираат дека оваа депонија, која ја нарекуваат монструм, секојдневно расте.
– Бараме итна реакција од надлежните институции, да се казнат тие што ја предизвикале оваа состојба и да се тргне дивата депонија од оваа локација. Дополнително, бараме од министерот за животна средина и просторно планирање, зет Меџити, да излезе од својата канцеларија и да ги согледа состојбите во Македонија. Македонските граѓани секојдневно се соочуваат со еколошки катастрофи, од запалени депонии до загаден воздух, загадени реки и езера. Ако не знае да се справи со овие катастрофи, време е да си поднесе оставка, затоа што не се во опасност само природните живеалишта туку и здравјето на луѓето – нагласи Андреј Куцуловски, координатор на Левица – Зелен сектор.
