Пристаништето Антверпен-Бриж е претворено во огромен паркинг, полн со автомобили, комбиња, камиони и трактори наменети за американскиот пазар, кои мируваат додека производителите се обидуваат да ги ублажат ефектите од царините на Доналд Трамп.
Според пристаништето, извозот на нови патнички автомобили и комбиња во САД се намалил за 15,9% во првите шест месеци од 2025 година во споредба со истиот период минатата година, а остриот пад е забележан во мај – еден месец откако американскиот претседател објави воведување царини по повод „Денот на ослободувањето“, пишува „Гардијан“.
Извозот на камиони и таканаречена „тешка и висока опрема“ се намалил за речиси една третина – за да бидеме прецизни 31,5%. Оваа категорија ги вклучува трактори и градежна механизација, а падот на трансатлантскиот сообраќај веројатно го одразува влијанието на царината од 25% врз возилата со цена над 100.000 долари.
Пристаништето Антверпен-Бриж е еден од најголемите светски центри за транспорт на автомобили, а само во 2024 година извезе повеќе од 3 милиони возила низ целиот свет.
„Перспективите за втората половина од годината остануваат неизвесни. Многу ќе зависи од тоа дали ЕУ и САД ќе успеат да постигнат трговски договор до 1 август“, се вели во соопштението на пристаништето.
Европските производители на автомобили, од Фолксваген до Волво, се надеваа дека ќе се постигне договор минатата недела, бидејќи истече рокот првично поставен од Трамп за постигнување договор за царини со ЕУ.
Пред Трамп да дојде на власт, се плаќаше царина од 2,5% за извоз на автомобили во САД, но од април се наплаќаат дополнителни 25%, што ја зголемува цената на семеен автомобил на американскиот пазар за десетици илјади долари.
Пристаништата низ Европа веќе беа погодени од Брегзит, пандемијата на коронавирусот и застојот на контејнерскиот сообраќај во 2024 година, при што застојот стана вообичаен во сите северни пристаништа, вели Џастин Аткин, претставник на пристаништето Антверпен-Бриж за Велика Британија и Ирска.
Во споредба со Брегзит, влијанието на царините беше „многу поголем непосреден шок“, вели тој.
„За време на пандемијата, имавме блокада, потоа отворање, па нова блокада – и луѓето научија да се прилагодуваат со текот на времето. Во овој случај… за царините се зборуваше пред доаѓањето на Трамп, но никој не се очекуваше ова ниво и сериозноста на мерките што беа веднаш преземени.“
Пристаништето не можеше да го наведе точниот број автомобили што чекаат транспорт, но вели дека има илјадници.
Аткин вели дека постојат и докази дека кинески автомобили се складираат во пристаништето, што може да укажува на пренасочување на трговијата од САД, бидејќи Кина се соочува со царински бариери.
Царинската криза, во комбинација со конфликтот во Црвеното Море и постојано растечките димензии на бродовите, го продолжи времето на пристанување во пристаништето од пет на дури осум дена, што дополнително ги оптоварува капацитетите за паркирање автомобили и контејнери.
САД се втор најголем трговски партнер на пристаништето Антверпен-Бриж, веднаш по Велика Британија, а постојат индикации дека американските извозници исто така брзо испраќаат стока за да избегнат можни контрамерки од ЕУ во случај на трговска војна.
Во првата половина од годината, увозот од САД се зголеми за 17%, со зголемување на испораките на течен природен гас.
The post АВТОМОБИЛИ КОИ НИКОЈ НЕ ГИ САКА Илјадници возила талкаат во европските пристаништа, додека царините на Трамп земаат данок appeared first on Локално.
