Директорката на Националната разузнавачка служба на САД, Тулси Габард, изјави дека постојат докази кои овозможуваат поднесување кривични пријави против лица од администрацијата на поранешниот американски претседател Барак Обама, поради наводно фабрикување докази за руско мешање во изборите во 2016 година.
„Имаме докази за кривично гонење на одговорните“, изјави Габард за телевизијата „Фокс њуз“, додавајќи дека следната недела ќе бидат објавени нови документи поврзани со наводната координација за преувеличување на руската вмешаност.
Истрагата на ФБИ за врските на изборниот штаб на Доналд Трамп со Русија започна во 2016 година и траеше и за време на неговиот прв мандат. Подоцна, таа стана предмет на независна истрага од страна на специјалниот обвинител Џон Дарем.
Габард најави дека јавноста наскоро ќе добие појасна слика за улогата на администрацијата на Обама во иницирањето на истрагата, која и натаму е политички чувствителна тема во САД.
