Препознајте ги луѓето со висока емоционална интелигенција: 4 реченици секогаш им се на ум

Емоционално интелигентна личност е некој што е свесен за своите и туѓите чувства и кој ги користи ефикасно во интеракцијата со околината.
Овие луѓе поседуваат емпатија, разбирање и вештини за решавање проблеми, што им овозможува да градат подобри односи и полесно да се справуваат со животните предизвици.
Многумина од вас веројатно барем еднаш во животот се запрашале што точно значи терминот емоционална интелигенција. Накратко, тоа е способност да ги перцепираме, контролираме и оценуваме нашите емоции, но и чувствата на луѓето околу нас. Постои мислење дека таквите луѓе се генерално посреќни во животот, поздрави и поисполнети, што сигурно не е без причина.
Тие имаат моќ да ја контролираат својата енергија, внимателно да ве слушаат, да ги обработуваат информациите, а потоа да ги преземат потребните чекори. Имаат самодоверба, самопочит, љубопитни се, знаат да простуваат, не се навредуваат лесно, тие се господари на сопствената среќа и се способни да се потсмеваат на сè, да го претворат нешто што се смета за монотоно и здодевно во незаборавно искуство.
На секого му се потребни такви луѓе, особено во денешно време кога често сме осамени и мислиме дека никој не нè разбира, нашите проблеми и стресови. Но, не е секогаш лесно да се препознае емоционално интелигентна личност.
Таа нема да открие никакви дипломи, титули, години или број на книги што ги прочитала. Наместо тоа, ќе ја препознаете по тоа како реагира во стресни ситуации, како се однесува кон другите и колку добро ги управува сопствените емоции.

Според експертите од списанието „Psychology Today“, ваквите луѓе имаат специфичен начин на комуникација и често ги користат овие четири едноставни, но многу важни реченици.

Јас згрешив
Овие два збора бараат храброст и зрелост. Луѓето со висока емоционална интелигенција не треба да бараат некој друг за да го обвинат, немаат проблем да ги признаат сопствените грешки. Тие разбираат дека никој не е совршен и непогрешлив и дека прифаќањето одговорност е добар начин да се стекне самодоверба и да се унапреди личниот развој.

Дали си добро?
Интересот за чувствата на другите често се крие во ова едноставно прашање. Емоционално интелигентните луѓе не се само чувствителни на зборови, туку и на тонот на гласот, изразот на лицето или суптилните промени во однесувањето. Тие се способни да препознаат кога нешто не е во ред, што им помага да обезбедат поддршка без директно да наметнат решение.

Разбирам зошто се чувствуваш така
Емпатијата не е безусловна согласност, туку разбирање. Оваа фраза сигнализира подготвеност да се запознае искуството на некој друг без осудување или споредба. Луѓето со висок коефициент на емоционална интелигенција се свесни за фактот дека не секој има исто мислење, не се плашат да ги откријат своите стравови и неуспеси и ја перцепираат ранливоста како сила и алатка за градење подлабоки односи.

Како можам да ти помогнам?
Тие често покажуваат искрен интерес на суптилни начини. Ќе ви понудат помош природно и спонтано, без да очекуваат ништо за возврат. За нив е важно лицето кое е во неволја да знае дека може да смета на нивната поддршка и дека тие ќе му дадат поттик кога е потребно.

Фото: Архива