Малколм Џамал Ворнер, ѕвездата на култната серија „The Cosby Show“, трагично почина на 54-годишна возраст за време на семеен одмор во Костарика.
Веста за неговата смрт ја потврди извор близок до семејството за списанието People, додека локалните власти ја открија причината за смртта – актерот се удавил откако бил повлечен од силна морска струја.
Инцидентот се случил во недела, 20 јули, на плажата во Лимон. Националната полиција на Костарика потврди дека смртта настапила како резултат на асфиксија, односно задушување предизвикано од давење, и дека идентитетот на актерот е официјално потврден.
Ворнер е најпознат на публиката по улогата на Теодор „Тео“ Хакстејбл, син на ликот што го играше Бил Козби, во легендарната комедија серија „The Cosby Show“, која се емитуваше од 1984 до 1992 година.
Тој беше номиниран за наградата Еми во 1986 година за оваа улога.
Роден е на 18 август 1970 година во Њу Џерси, а неговите родители го крстиле по Малколм Икс и џез-пијанистот Ахмад Џамал. Ја започнал својата кариера како дете актер, а на аудиција за „Козби шоу“ се пријавил на последниот ден од националната потрага, а самиот Козби го избрал за улогата.
По огромниот успех на серијата, Ворнер продолжил да ја гради својата кариера преку улоги во серии како „Малколм и Еди“, каде што глумел од 1996 до 2000 година со Еди Грифин, како и „Рид меѓу линиите“ од 2011 до 2015 година.
Гледачите го обожавале и по неговите улоги во популарни серии како „Suits“, „The Resident“, „Major Crimes“, како и во поновите проекти „9-1-1“ и „Alert: Missing Persons Unit“.
Покрај тоа што е актер, Ворнер работел и како извршен продуцент, меѓу другото, на детскиот проект „Magical school bus“.
