Вооружени судири избувнаа рано утрово меѓу Тајланд и Камбоџа, соопштија војските на двете земји, тврдејќи дека другата страна ги испукала првите истрели.
Тајландската војска во соопштението наведува дека вооружените сили на соседна Камбоџа отвориле оган врз спорната погранична област во близина на храмот Та Моан Том, на околу 360 километри од главниот град Бангкок.
Поранешниот камбоџански лидер Хун Сен рече дека земјата „нема друг избор освен да се брани“ од Тајланд, апелирајќи до граѓаните да останат смирени и да избегнуваат панично купување.
„Инвазија. Тајландската армија објави дека денес ќе го затвори влезот во храмот Та Моан Том, што беше наредено вчера, а тајландските војници сега почнаа да ја напаѓаат камбоџанската армија“, напиша Хун Сен на Фејсбук утрово. Камбоџанската војска нема друг избор освен да се соочи и да возврати, додаде тој“.
Во подоцнежна објава, тој рече дека учествувал во воени команди преку видео врска, откако се појавија гласини дека ја напуштил Камбоџа и заминал во Кина.
„Седам тука откако командантот на Вториот регион на Тајланд рече дека ќе го затвори влезот во храмот Та Моан Том“, рече Хун Сен, јасно обвинувајќи го тајландскиот командант за ескалација на конфликтот.
„Ве молам, драги Камбоџани, не паничете, не трчајте да купувате ориз, не собирајте залихи или не продавајте стока по повисоки цени“, рече поранешниот лидер и татко на сегашниот премиер Хун Манет.
Тој, исто така, ги повика Камбоџанците да продолжат да работат нормално „освен во пограничните области на провинциите Одар Минчи и Преах Вихер, кои беа нападнати од тајландската армија“.
Борбите меѓу Тајланд и Камбоџа прво мора да престанат пред да можат да започнат преговорите, изјави денес привремениот премиер на Тајланд, Фумтам Вечајачаи, како што објави Ројтерс.
Вечајачаи на прес-конференција изјави дека војната не е објавена и дека конфликтот не се шири во повеќе провинции. Тој додаде дека Камбоџа испукала тешко оружје кон Тајланд без конкретни цели, што резултирало со цивилни жртви.
И Тајланд и Камбоџа се рангирани меѓу најпријателските земји во светот, а само пред пет години, овие соседи од Југоисточна Азија веруваа дека нивното пријателство не може да се раскине, наведе „ТАЈМ“.
„Бидејќи споделуваме долга граница, двајцата знаеме дека мора да живееме и да растеме заедно“, му рече тогашниот тајландски амбасадор во Камбоџа, Пањарак Пултуп, на тогашниот камбоџански премиер Хун Сен. „Политичка волја секогаш постои за решавање на сите проблеми што може да се појават“.
Сепак, во последните месеци, билатералните односи се спуштија на опасно ниво, а двете земји сега се вклучени во вооружен конфликт на границата.
The post Вооружен судир меѓу Тајланд и Камбоџа – најпријателските земји во светот: Кој прв почна? appeared first on Вечер …1963 | Vecer MK.
