Audi го проширува своето премиум портфолио со две нови plug-in хибридни изведби на моделот A6 – лимузина и караван. Двете верзии – A6 Avant e-hybrid quattro и A6 Sedan e-hybrid quattro – се достапни во две нивоа на моќност: 220 kW и 270 kW, со значително подобрена батерија и зголемен електричен досег од над 100 километри.
Срцето на новите plug-in хибриди е батерија со капацитет од 25.9 kWh (20.7 kWh нето), што е за околу 45% повеќе од претходната генерација. Благодарение на ова, A6 може да вози повеќе од 100 километри исклучиво на електрична енергија. Батеријата се полни со максимална AC моќност од 11 kW, што овозможува целосно полнење за само 2,5 часа.
Во поглед на перформансите, и двете верзии имаат турбо бензинец 2.0 TFSI со 185 kW и електромотор со 105 kW. Комбинираната моќност кај посилната верзија достигнува 270 kW и 500 Nm вртежен момент, што овозможува забрзување од 0 до 100 km/h за само 5.3 секунди. Послабата конфигурација од 220 kW и 450 Nm стигнува до 100 km/h за 6.0 секунди. Максималната брзина кај сите изведби е 250 km/h.
Новиот систем за рекуперација на енергија е прилагодлив во три нивоа преку лопатките на управувачот, а возилото автоматски ја користи навигацијата за оптимално искористување на батеријата. Два основни режима на работа се достапни: „EV“ за целосно електрично возење и „Hybrid“ за балансирано управување со ресурсите.
Со „quattro ultra“ погон на сите тркала, нов 7-брзински менувач со две спојки и сериско управување на сите тркала, новите A6 e-hybrid модели нудат подобрена агилност, стабилност и тивко возење – благодарение и на подобрената звучна изолација, која е до 30% поефикасна од претходно.
Цените во Германија започнуваат од 65.800 евра за A6 Sedan e-hybrid quattro со 220 kW и 68.300 евра за Avant верзијата. Помоќната изведба со 270 kW започнува од 75.050 евра за Sedan и 77.550 евра за Avant.
Тие доаѓаат со S line опрема, спортска суспензија, поголеми тркала и црвени кочници како дел од сериската конфигурација. Продажбата започнува на 8 мај 2025 година, а првите испораки се очекуваат во лето.
Следете не и на:
time.mk
